У ХХ ст. было шмат спроб выявіць першапачатковае месцазнаходжанне горада, але толькі ў 1968 г. яны ўвянчаліся поспехам. З 1969 па 1981 гг. пад кіраўніцтвам доктара гістарычных навук, прафесара Лысенка Пятра Фёдаравіча адбываліся раскопкі, у выніку якіх было выяўлена больш за 220 драўляных пабудоў XI–XIII стст., тры вулічныя маставыя, частаколы, шматлікія прадметы матэрыяльнай культуры таго часу. Была ўскрыта плошча 1800 м², з якіх больш за 500 м² да мацерыка.

18 студзеня 1972 г. Савет Міністраў БССР прыняў рашэнне аб стварэнні музея «Бярэсце» і будаўніцтве спецыяльнага павільёна. Яго праект распрацавалі архітэктары «Белдзяржпраекта» В. У. Крамарэнка, М. К. Вінаградаў, У. І. Шчэрбіна. Павільён плошчай 40 x 60 м пабудаваны з бетону, шкла, анадзіраванага алюмінію і ўяўляе сабой двухскатнае перакрыцце са светавым ліхтаром па цэнтры. Яго абрысы нагадваюць старажытнае жытло і адначасова пласты зямлі, якія раскрываюць старажытны горад.

2 сакавіка 1982 г. археалагічны музей «Бярэсце» быў адчынены для наведвальнікаў. У цэнтры павільёна – раскоп, які займае плошчу 1118 м². На глыбіні 4 м знаходзіцца частка рамесніцкага квартала – 28 жылых і гаспадарчых пабудоў XIII ст., дзве вулічныя маставыя, частакол, рэшткі глінабітных печаў. Дзякуючы гідраізаляцыйным асаблівасцям глебы і магутнаму культурнаму пласту да 7 м, кісларод практычна не пранікаў углыб. Гэта стварыла спрыяльныя ўмовы для захаванасці артэфактаў. Многія пабудовы захаваліся на 5–9 вянцоў, а некаторыя нават на 12, што з’яўляецца вялікай рэдкасцю. Раскопкі выявілі арыгінальную планіроўку старажытнага Бярэсця. Будынкі прымыкалі да вуліц глухімі сценамі, ставіліся ў 3–4 рады між вуліцамі на адлегласці 0,4–0,6 м адзін ад аднаго. Пабудовы ўяўляюць сабой аднакамерныя, наземныя будынкі квадратнай формы. Асноўным будаўнічым матэрыялам для іх былі бярвенні з дрэў хваёвых парод. Падмуркам з’яўляліся падклады пад вуглы дамоў ці рэшткі папярэдніх забудоў.

Шматлікую групу знаходак з каляровых металаў складаюць жаночыя ўпрыгожванні. Звяртае на сябе ўвагу білонавы колт XIII ст. з сімвалічным малюнкам зерня, якое прарастае. Ва ўнутраную поласць артэфакта ўкладалі тканіну, намочаную духмянымі масламі.

Земляробства і жывёлагадоўля гралі вялікую ролю ў эканоміцы Бярэсця. Асноўнымі інструментамі для апрацоўкі зямлі з’яўляліся рала і саха. У культурным пласце XIII ст. было знойдзена адзінае ў Еўропе дубовае рала гэтага перыяду.

Выгаднае геаграфічнае месцазнаходжанне спрыяла ўдзелу Бярэсця ў міжнародным гандлі. Горад развіваў эканамічныя сувязі з Падняпроўем, Валынню, Прычарнамор’ем, Каўказам, Усходам, Прыбалтыкай, заходнееўрапейскімі землямі. Сярод прадметаў імпартнага паходжання вылучаюцца ракавіны кауры ХI–ХII стст., якія сустракаюцца пераважна ў Індыйскім акіяне. З іх рабілі жаночыя ўпрыгожванні ці выкарыстоўвалі як разменную манету.

Аб высокім узроўні развіцця культуры Бярэсця сведчыць распаўсюджанне пісьменнасці. Адной з унікальных знаходак з’яўляецца самшытавы грэбень з выразанымі літарамі кірылічнага алфавіта на абодвух баках. Гэты прадмет – старэйшы «падручнік» для навучання грамаце на тэрыторыі Беларусі.

Шахматная фігура караля ХIII ст. адносіцца да ліку высокамастацкіх вырабаў з косткі. Па тэхналогіі вытворчасці яна характарызуецца акуратнасцю ў разьбе і апрацоўцы. На тэрыторыі сучаснай Беларусі падчас археалагічных прац было знойдзена 70 шахматных фігур. З іх толькі 4, улічваючы берасцейскага шахматнага караля, адносяцца да выяўленчых шахмат, якія адлюстроўваюць рэальныя рысы і абрысы, а не абстрактныя фігуры.

• Аўдыягід на рускай, беларускай, англійскай, кітайскай і польскай мовах. Дастаткова навесці мабільную прыладу на QR-код і інфармацыя якая цікавіць высвеціцца на экране, прагучаўшы ў гукавым выкананні.
• Віртуальная экскурсія па археалагічнаму раскопу дазваляе дакрануцца да гісторыі.
• 3D-акуляры дэманструюць праграмы віртуальнай рэальнасці, панарамы старажытнага Бярэсця.
• У кіназале дэманструюць 5 дакументальных фільмаў пра Бярэсце.

Наведвальнікаў чакаюць:

• Тэматычная і аглядавая экскурсіі па археалагічнаму музею.
• Тэматычная экскурсія па сумежнай тэрыторыі.
• Тэматычная экскурсія «Рублена сякерай».
• Тэматычная лекцыя «Старажытнае Бярэсце».
• Мерапрыемства «Квэст-экскурсія».